હૈદરાબાદના સાંસદ ઓવૈસીએ કહ્યું કે, ‘અમારા પર શંકા કેમ કરવામાં આવે છે ? જે લોકો મળીને આવ્યા છે, તેમને પૂછો કે તેઓ શું વાત કરીને આવ્યા છે
રાષ્ટ્રીય સ્વયંસેવક સંઘના વડા મોહન ભાગવતે ગુરુવારે દિલ્હીની એક મસ્જિદમાં ‘ઓલ ઈન્ડિયા ઈમામ સંગઠન’ના વડા ઈમામ ઉમર અહેમદ ઈલ્યાસી સાથે મુલાકાત કરી હતી. અગાઉ તેઓ મુસ્લિમ બૌદ્ધિકોને મળ્યા હતા. AIMIMના વડા અસદુદ્દીન ઓવૈસીએ આ બેઠક પર તીખી પ્રતિક્રિયા આપી છે.
હૈદરાબાદના સાંસદ ઓવૈસીએ કહ્યું કે, ‘અમારા પર શંકા કેમ કરવામાં આવે છે ? જે લોકો મળીને આવ્યા છે, તેમને પૂછો કે તેઓ શું વાત કરીને આવ્યા છે. આરએસએસની વિચારધારા આખી દુનિયા જાણે છે અને તમે જઈને એમને મળો છો. આ જે મુસ્લિમ સમુદાયમાં કહેવાતો શિક્ષિત વર્ગ છે, તેઓ એ કરશે તે સાચું છે અને અમે, જેઓ અમારી લડાઈ રાજકીય અધિકારો અને મૂળભૂત અધિકારો માટે લડીએ છીએ, તો અમે ખરાબ બની જઈએ છીએ.’
તેમણે આગળ કહ્યું, ‘આ તે વર્ગ છે જે પોતાને જ્ઞાની માને છે. તેમને વાસ્તવિકતા સાથે કોઈ લેવાદેવા નથી. તેઓ જાણતા નથી કે જમીન પર શું થઈ રહ્યું છે. આરામથી જીવન જીવે છે અને RSS ચીફને મળે છે. આ તમારો લોકતાંત્રિક અધિકાર છે… હું સવાલ નથી ઉઠાવી રહ્યો પણ પછી તમને પણ મને સવાલ કરવાનો કોઈ અધિકાર નથી.’
આ બેઠક કસ્તુરબા ગાંધી માર્ગ મસ્જિદમાં બંધ બારણે એક કલાકથી વધુ સમય સુધી ચાલી હતી. ઓલ ઈન્ડિયા ઈમામ ઓર્ગેનાઈઝેશનની ઓફિસ અહીં આવેલી છે. ભાગવતની સાથે આરએસએસના વરિષ્ઠ કાર્યકર્તા કૃષ્ણ ગોપાલ, રામ લાલ અને ઈન્દ્રેશ કુમાર પણ હતા. રામ લાલ અગાઉ ભાજપના સંગઠન સચિવ હતા જ્યારે કુમાર મુસ્લિમ રાષ્ટ્રીય મંચના સંરક્ષક છે.
મીટિંગની વિગતો શેર કરતા, અહેમદ ઇલ્યાસીના ભાઈ સુહૈબ ઇલ્યાસીએ કહ્યું, “તે ખૂબ જ સારી વાત છે કે ભાગવત અમારા પિતાની પુણ્યતિથિ પર અમારા આમંત્રણ પર આવ્યા હતા. આનાથી દેશને સારો સંદેશ પણ ગયો છે.
કયા મુદ્દાઓ પર ચર્ચા થઈ?
સાંપ્રદાયિક સૌહાર્દને મજબૂત કરવા માટે આરએસએસ પ્રમુખ મુસ્લિમ બુદ્ધિજીવીઓ સાથે ચર્ચા કરી રહ્યા છે. તેઓ તાજેતરમાં દિલ્હીના ભૂતપૂર્વ લેફ્ટનન્ટ ગવર્નર નજીબ જંગ, ભૂતપૂર્વ મુખ્ય ચૂંટણી કમિશનર એસ.વાય કુરેશી, અલીગઢ મુસ્લિમ યુનિવર્સિટીના ભૂતપૂર્વ વાઇસ ચાન્સેલર લેફ્ટનન્ટ જનરલ ઝમીરુદ્દીન શાહ, ભૂતપૂર્વ સાંસદ શાહિદ સિદ્દીકી અને ઉદ્યોગપતિ સઈદ શેરવાનીને મળ્યા હતા.
આ બેઠકમાં ભાગવતે હિંદુઓ માટે ‘કાફિર’ શબ્દના ઉપયોગનો મુદ્દો ઉઠાવ્યો હતો અને કહ્યું હતું કે, આનાથી સારો સંદેશ નથી મળતો. મુસ્લિમ બુદ્ધિજીવીઓએ કેટલાક દક્ષિણપંથી સંગઠનો દ્વારા મુસ્લિમોને “જેહાદી” અને “પાકિસ્તાની” તરીકે લેબલ કરવા સામે વાંધો ઉઠાવ્યો હતો.
RSSએ શું કહ્યું?
મુસ્લિમ બુદ્ધિજીવીઓએ ભાગવતને એમ પણ કહ્યું હતું કે ‘કાફિર’ શબ્દના ઉપયોગ પાછળ કોઈ અન્ય હેતુ હતો પરંતુ કેટલાક વિભાગોમાં હવે તેનો ઉપયોગ “અપશબ્દ” તરીકે થઈ રહ્યો છે. બુદ્ધિજીવીઓની ચિંતાઓને સમજતા, આરએસએસના વડાએ કહ્યું કે “તમામ હિન્દુઓ અને મુસ્લિમોના ડીએનએ સમાન છે”.
આરએસએસ પ્રચાર પ્રમુખ સુનીલ આંબેકરે જણાવ્યું હતું કે, “આરએસએસ સરસંઘચાલક દરેક વર્ગના લોકો સાથે મુલાકાત કરે છે. આ સતત ચાલી રહેલી સામાન્ય ‘સંવાદ’ પ્રક્રિયાનો એક ભાગ છે.
