(એચ.એસ.એલ),તા.૪
ભારતે સંયુક્ત રાષ્ટ્રમાં એક ઠરાવ પર ઈઝરાઈલ વિરુદ્ધ મતદાન કરીને વિશ્વના રાજદ્વારી નિષ્ણાતોને ચોંકાવી દીધા છે. સંયુક્ત રાષ્ટ્રમાં ઈઝરાઈલ વિરુદ્ધ લાવવામાં આવેલા આ ઠરાવમાં ભારત પેલેસ્ટાઈનની સાથે ઊભું હતું. એટલું જ નહીં, ભારતે પેલેસ્ટાઈનની તરફેણમાં અને ઈઝરાઈલની વિરુદ્ધમાં મતદાન કર્યું.

વડાપ્રધાન નરેન્દ્ર મોદીની આ જબરદસ્ત મુત્સદ્દીગીરીએ આખી દુનિયાને ચોંકાવી દીધી છે. આખી દુનિયા આશ્ચર્યમાં છે કે, શું આ એ જ ભારત છે, જેણે ૭ ઓક્ટોબર ૨૦૨૩ના રોજ ઈઝરાઈલ પર થયેલા હુમલા બાદ સૌથી પહેલા પીએમ બેન્જામિન નેતન્યાહુને ફોન કર્યો હતો અને માત્ર ઈઝરાઈલની સાથે સંપૂર્ણ રીતે ઉભા રહેવાની ખાતરી જ આપી ન હતી, પરંતુ નેતન્યાહુની સાથે પણ ઉભો હતો.

અગાઉ, સંયુક્ત રાષ્ટ્રમાં ઈઝરાઈલ વિરુદ્ધ ઘણા ઠરાવ લાવવામાં આવ્યા હતા, પરંતુ ભારતે કાં તો ઈઝરાઈલની તરફેણમાં મતદાન કર્યું હતું અથવા મતદાન પ્રક્રિયાથી દૂર રહ્યું હતું. પરંતુ આ વખતે ભારત ખુલ્લેઆમ ઈઝરાઈલ વિરુદ્ધ મતદાનમાં પેલેસ્ટાઈનની સાથે ઊભું જાેવા મળ્યું હતું.

ભારતના આ સ્ટેન્ડે વિશ્વના અગ્રણી રાજદ્વારીઓને પણ મૂંઝવણમાં મૂકી દીધા છે. દુનિયા એ વિચારી રહી છે કે, પીએમ મોદીની એવી કઈ મુત્સદ્દીગીરી છે જેના દ્વારા તેઓ પક્ષો અને વિપક્ષ બંનેને જીતાડવામાં સફળ રહે છે. વડાપ્રધાન મોદીના આ પ્રભાવશાળી નેતૃત્વની ચર્ચા દરેક જગ્યાએ થઈ રહી છે. ખાસ વાત એ છે કે, આ પ્રસ્તાવ પર પેલેસ્ટાઈનના પક્ષમાં ઊભા રહેવા છતાં ઈઝરાઈલે ભારત પ્રત્યે કોઈ નારાજગી વ્યક્ત કરી નથી.

ચાલો હવે તમને જણાવીએ કે આ સમગ્ર મામલો ખરેખર શું છે?

યુનાઇટેડ નેશન્સ જનરલ એસેમ્બલીમાં, ભારતે ઇઝરાયલની વિરુદ્ધમાં અને યુએનજીએ ઠરાવની તરફેણમાં મતદાન કર્યું હતું, જેમાં ઈઝરાઈલને પૂર્વ જેરૂસલેમ અને ૧૯૬૭થી કબજે કરાયેલા અન્ય પેલેસ્ટિનિયન પ્રદેશોમાંથી પાછા ખેંચવા માટે કહેવામાં આવ્યું હતું. તે જ સમયે, પશ્ચિમ એશિયામાં વ્યાપક, ન્યાયી અને કાયમી શાંતિ હાંસલ કરવાના આહવાનને પુનરોચ્ચાર કરવામાં આવ્યો છે. સેનેગલ દ્વારા રજૂ કરાયેલ ‘પેલેસ્ટાઈનના પ્રશ્નના શાંતિપૂર્ણ ઉકેલ’ અંગેના ડ્રાફ્ટ ઠરાવને મંગળવારે ૧૯૩ સભ્યોની મહાસભામાં ભારે બહુમતીથી સ્વીકારવામાં આવ્યો હતો. તેની તરફેણમાં મતદાન કરનારા ૧૫૭ દેશોમાં ભારત સામેલ હતું.

યુએનજીએના આઠ સભ્ય દેશો – આજેર્ન્ટિના, હંગેરી, ઈઝરાઈલ, માઇક્રોનેશિયા, નૌરુ, પલાઉ, પપુઆ ન્યુ ગિની અને યુનાઇટેડ સ્ટેટ્‌સ – એ યુએનજીએના ઠરાવની વિરુદ્ધમાં અને ઈઝરાઈલની તરફેણમાં મતદાન કર્યું. કેમરૂન, ચેકિયા, એક્વાડોર, જ્યોર્જિયા, પેરાગ્વે, યુક્રેન અને ઉરુગ્વે દૂર રહ્યા હતા. સંશોધિત તરીકે મૌખિક રીતે અપનાવવામાં આવેલ ઠરાવમાં સંયુક્ત રાષ્ટ્રના સંબંધિત ઠરાવોના આધારે “પશ્ચિમ એશિયામાં વ્યાપક, ન્યાયી અને સ્થાયી શાંતિની વિલંબ કર્યા વિના સિદ્ધિ” અને પૂર્વ જેરુસલેમ સહિત ૧૯૬૭માં શરૂ થયેલા ઈઝરાઈલના કબજાનો અંત લાવવા માટે કહેવામાં આવ્યું છે.

ઠરાવમાં “પૂર્વ જેરુસલેમ સહિત ૧૯૬૭થી કબજે કરાયેલા પેલેસ્ટિનિયન પ્રદેશોમાંથી સેના પાછી ખેંચી લેવા” અને પેલેસ્ટિનિયન લોકોના અધિકારોની અનુભૂતિ, મુખ્યત્વે સ્વ-ર્નિણયના અધિકાર અને સ્વતંત્ર રાજ્યના તેમના અધિકારની અનુભૂતિ માટે કહેવામાં આવ્યું હતું. ઠરાવ દ્વારા, જનરલ એસેમ્બલીએ આંતરરાષ્ટ્રીય કાયદા અનુસાર ઈઝરાઈલ અને પેલેસ્ટાઇન માટેના બે-રાજ્ય ઉકેલ માટે તેના અવિશ્વસનીય સમર્થનની પુનઃપુષ્ટિ કરી, જે હેઠળ બંને ૧૯૬૭ પૂર્વેની સરહદો પર આધારિત માન્ય સરહદોની અંદર શાંતિ અને સલામતી સાથે જીવશે તેવું ઠરાવ ગાઝા પટ્ટીમાં વસ્તી વિષયક અથવા પ્રાદેશિક પરિવર્તન લાવવાના કોઈપણ પ્રયાસોને નકારી કાઢે છે, જેમાં ગાઝાના પ્રદેશને મર્યાદિત કરતી કોઈપણ કાર્યવાહીનો સમાવેશ થાય છે. ઠરાવમાં એ પણ ભાર મૂક્યો હતો કે, ગાઝા પટ્ટી એ ૧૯૬૭માં કબજે કરાયેલા પેલેસ્ટિનિયન પ્રદેશોનો અભિન્ન ભાગ છે અને તે “બે-રાજ્ય ઉકેલની દ્રષ્ટિને પુનઃપુષ્ટ કરે છે, જેમાં ગાઝા પટ્ટી પેલેસ્ટાઇનનો ભાગ હશે. “લશ્કરી હુમલા, વિનાશ અને આતંકવાદી કૃત્યો સહિત તમામ હિંસા અને ઉશ્કેરણીના કાર્યોને સંપૂર્ણપણે બંધ કરવા પર ભાર મૂકવામાં આવ્યો છે.

ભારતે જનરલ એસેમ્બલીમાં અન્ય એક ઠરાવની તરફેણમાં મતદાન કર્યું હતું જેમાં માગણી કરવામાં આવી હતી કે, ઈઝરાઈલ સુરક્ષા પરિષદના સંબંધિત ઠરાવોના અમલીકરણમાં કબજા હેઠળના સીરિયન ગોલાનમાંથી પીછેહઠ કરે અને જૂન ૧૯૬૭ની સરહદ રેખાઓ પર પાછા ફરે. ગોલાન હાઇટ્‌સ દક્ષિણ-પશ્ચિમ સીરિયામાં એક ખડકાળ ઉચ્ચપ્રદેશ છે, જે દમાસ્કસ (સીરિયાની રાજધાની)થી લગભગ ૬૦ કિલોમીટર દક્ષિણે છે. તે દક્ષિણમાં યાર્મૌક નદી અને પશ્ચિમમાં ગેલીલ સમુદ્રથી ઘેરાયેલું છે. સંયુક્ત રાષ્ટ્ર આ વિસ્તારને સીરિયાનો ભાગ માને છે. જાેકે, ૧૯૬૭માં છ-દિવસીય યુદ્ધ દરમિયાન ઈઝરાઈલે ગોલાન હાઇટ્‌સ પર કબજાે કર્યો હતો. આ પ્રસ્તાવની તરફેણમાં ૯૭ વોટ પડ્યા જ્યારે ઓસ્ટ્રેલિયા, કેનેડા, ઈઝરાઈલ, બ્રિટન અને યુએસ સહિત આઠ લોકોએ તેની વિરુદ્ધમાં વોટ આપ્યા. ૬૪ દેશોએ મતદાનમાં ભાગ લીધો ન હતો.