સૌથી મોંઘો ઝીરો ટીઆરપી એન્કર ગણાવતા રવીશ કુમારે NDTVમાં અદાણી ગ્રુપની એન્ટ્રીથી પોતાની વાત જાહેર કરી
અદાણી ગ્રુપે મીડિયા સમૂહ NDTVમાં 29 ટકા હિસ્સો ખરીદ્યો છે. ત્યારથી ચર્ચાઓનું બજાર ગરમ છે. એવી અટકળો પણ છે કે કંપની પર અદાણી ગ્રૂપની પકડ મજબૂત થવાને કારણે પ્રખ્યાત એન્કર રવીશ કુમાર પણ ટીવી ચેનલમાંથી રાજીનામું આપી શકે છે. આ દરમિયાન રવીશ કુમારે ખુદ ઈશારામાં આવી અટકળોનો જવાબ આપ્યો હતો. પોતાની સ્ટાઈલમાં તેમણે ટ્વીટ કરીને આવી અટકળોને નકારી કાઢી છે.
રવીશ કુમારે લખ્યું, ‘માનનીય લોકો, મારું રાજીનામું માત્ર એક અફવા છે, કારણ કે વડા પ્રધાન નરેન્દ્ર મોદી મને ઇન્ટરવ્યુ આપવા માટે સંમત થયા છે અને અક્ષય કુમાર બોમ્બે કેરી સાથે ગેટ પર મારી રાહ જોઈ રહ્યા છે.’ આટલું જ નહીં રવીશ કુમારે પોતાને દુનિયાનો પહેલો અને સૌથી મોંઘો ઝીરો ટીઆરપી એન્કર પણ ગણાવ્યો છે. રવીશ કુમારના ટ્વીટને મોટી સંખ્યામાં લોકોએ રીટ્વીટ કર્યું છે.
તમને જણાવી દઈએ કે જ્યારથી NDTVનો હિસ્સો અદાણી ગ્રૂપના હાથમાં ગયો છે ત્યારથી સોશિયલ મીડિયા પર ચર્ચાનો દોર વધી રહ્યો છે. મોટી સંખ્યામાં લોકો મીમ્સ પણ શેર કરી રહ્યા છે. સોશિયલ મીડિયા પર લોકોના અભિપ્રાય પણ વહેંચાયેલા જોવા મળ્યા છે. મોટી સંખ્યામાં લોકોએ રવીશ કુમારને સારા પત્રકાર ગણાવી તેમનું સમર્થન કર્યું છે. તે જ સમયે, એક વર્ગ એવો પણ છે, જેણે સોશિયલ મીડિયા પર પૂછ્યું હતું કે રવીશ કુમાર હવે શું કરશે.
