આ મહિને નાણાં સંબંધિત ઘણા કાર્યો છે જેની સમયમર્યાદા નજીક આવી ગઈ છે.
વર્તમાન નાણાકીય વર્ષ ૨૦૨૩-૨૪ તેના અંતના આરે છે. ૩૧ માર્ચ, ૨૦૨૪એ નાણાકીય વર્ષ ૨૦૨૩-૨૪ના અંત માટેનો છેલ્લો દિવસ છે, પરંતુ આ તારીખ રોકાણ, ટેક્સ ફાઇલિંગ, ટેક્સ સેવિંગ જેવા વ્યક્તિગત નાણાં સંબંધિત તમામ કાર્યો માટેની અંતિમ તારીખ પણ છે. જેમાં ફાસ્ટેગ કેવાયસી, ટેક્સ કપાત માટે ટીડીએસ ફાઇલિંગ સર્ટિફિકેટ, ટેક્સ સેવિંગ, આઇટીઆર જેવા કાર્યોનો સમાવેશ થાય છે. વર્તમાન નાણાકીય વર્ષનો અંતિમ મહિનો ચાલી રહ્યો છે. આ મહિને નાણાં સંબંધિત ઘણા કાર્યો છે જેની સમયમર્યાદા નજીક આવી ગઈ છે. ત્યારે કેટલાક મહત્વપૂર્ણ કાર્યો ૩૧ માર્ચ પહેલા પતાવી દેજાે.
ચાલો જાણીએ કયા કયા તે કામો છે.
અપડેટ કરેલ ITR ફાઇલ કરવાની અંતિમ તારીખ પણ જાણી લો.. નાણાકીય વર્ષ ૨૦૨૧ (અસેસમેન્ટ વર્ષ ૨૦૨૧-૨૨) માટે અપડેટેડ આવકવેરા રિટર્ન ફાઇલ કરવાની છેલ્લી તારીખ ૩૧ માર્ચ, ૨૦૨૪ છે. આ સમયમર્યાદાનો ઉપયોગ કરદાતાઓ દ્વારા કરી શકાય છે. જેમણે અગાઉ નાણાકીય વર્ષ ૨૦૨૦-૨૧ (અસેસમેન્ટ વર્ષ ૨૦૨૧-૨૨) માટે તેમનું રિટર્ન ફાઇલ કર્યું ન હતું અથવા અજાણતામાં તેમની કોઈપણ આવકની જાણ કરવાનું ચૂકી ગયા હતા અથવા અગાઉ ફાઇલ કરતી વખતે ખોટી આવકની વિગતો આપવામાં આવી હતી. વધુમાં, કરદાતાઓને ચોક્કસ નિયમોને આધીન ૨૪ મહિનાની અંદર એટલે કે, આકારણી વર્ષના અંતથી ૨ વર્ષમાં અપડેટેડ રિટર્ન ફાઇલ કરવાની સુવિધા છે. આવી સ્થિતિમાં જે કરદાતાઓએ નાણાકીય વર્ષ ૨૦૧૯-૨૦ માટે અરજી કરી નથી તેમની પાસે ૩૧ માર્ચ ૨૦૨૪ સુધી અરજી કરવાની તક છે.
ટેક્સ સેવિંગ સ્કીમની અંતિમ તારીખ પણ જાણી લો..
જાે તમે જૂની ટેક્સ સિસ્ટમનો વિકલ્પ પસંદ કર્યો હોય અને નાણાકીય વર્ષ ૨૦૨૩-૨૪ માટે ટેક્સ સેવિંગ મેળવવાની સ્કીમમાં રોકાણ કરવા માંગો છો, તો વિકલ્પ પસંદ કરવાની છેલ્લી તારીખ ૩૧ માર્ચ ૨૦૨૪ છે. આ તારીખ પહેલા રોકાણ કરીને તમે ટેક્સમાં છૂટ મેળવી શકો છો. પબ્લિક પ્રોવિડન્ટ ફંડ (PPF), ઇક્વિટી-લિંક્ડ સેવિંગ સ્કીમ (ELSS) અને ટર્મ ડિપોઝિટ (FD) જેવી વિવિધ કર બચત યોજનાઓ આવકવેરાની કલમ ૮૦C હેઠળ ઉપલબ્ધ છે. આ ઉપરાંત, આરોગ્ય વીમા, વીમા પ્રીમિયમ, શિક્ષણ લોન અને હોમ લોન જેવા ખર્ચાઓ પણ કેટલાક અન્ય વિકલ્પો છે જે તમને તમારી આવક પર કર કપાતનો લાભ આપી શકે છે અને તમારી કર જવાબદારી ઘટાડી શકે છે. આ ઉપરાંત, જૂના કરવેરા શાસનને પસંદ કરતા કરદાતાઓ આવકવેરાની કલમ ૮૦D, ૮૦G અને ૮૦CCD(1B) હેઠળ વધારાના લાભો પણ મેળવી શકે છે. આ માટે તમે તમારા નાણાકીય સલાહકારની મદદ લઈ શકો છો.
મિનિમમ ઈન્વેસ્ટમેન્ટ ડેડલાઈન પણ જાણી લો…
PPF અથવા સુકન્યા સમૃદ્ધિ યોજના (SSY) જેવી સરકારી નાની બચત યોજનાઓ માટે વાર્ષિક ધોરણે અનુક્રમે રૂ. ૫૦૦ અને રૂ. ૨૫૦નું લઘુત્તમ રોકાણ જરૂરી છે. જાે તમે કોઈપણ નાણાકીય વર્ષમાં આ ન્યૂનતમ ડિપોઝિટ જમા કરવાનું ચૂકી ગયા હો, તો તમારું એકાઉન્ટ ડિફોલ્ટ તરીકે ચિહ્નિત થઈ શકે છે. આવું ખાતું ખોલાવવા પર દંડ પણ થઈ શકે છે. તેથી, જાે તમે આવી કોઈપણ યોજનામાં રોકાણ કર્યું હોય પરંતુ વર્તમાન નાણાકીય વર્ષ દરમિયાન તેમાં ન્યૂનતમ રકમનું રોકાણ કર્યું નથી, તો તમારી પાસે ડિફોલ્ટ અથવા દંડ ભરવાથી બચવા માટે ૩૧ માર્ચ, ૨૦૨૪ સુધીનો સમય છે.
TDS ફાઇલિંગ સર્ટિફિકેટ પણ જાણી લો..
કરદાતાઓએ ૩૧ માર્ચ, ૨૦૨૪ પહેલા TDS પ્રમાણપત્ર જાહેર કરવાનું રહેશે. તેઓએ વિવિધ કલમો હેઠળ કર કપાતની વિગતો પણ આપવી પડશે. આ ઉપરાંત ૩૧મી માર્ચ પહેલા ચલણ સ્ટેટમેન્ટ ફાઇલ કરવાનું પણ જરૂરી રહેશે.
ફાસ્ટેગ કેવાયસીની અંતિમ તારીખ પણ જાણી લો..
તાજેતરમાં, FASTag વપરાશકર્તાઓને પડતી સમસ્યાઓને ધ્યાનમાં રાખીને, નેશનલ હાઈવે ઓથોરિટી ઓફ ઈન્ડિયા (NHAI) એ FASTag KYC વિગતો અપડેટ કરવાની સમયમર્યાદા ૨૯ ફેબ્રુઆરીથી વધારીને ૩૧ માર્ચ, ૨૦૨૪ કરી છે.
(જી.એન.એસ)
