નોકરી આપવાના નામે એક નવું કૌભાંડ ચાલી રહ્યું છે. જો તમે તેની જાળમાં ફસાઈ જશો તો તમને ઘણું નુકસાન થશે. આ કૌભાંડ માટે ઇન્સ્ટન્ટ મેસેજિંગ પ્લેટફોર્મ વોટ્સએપ અને એસએમએસનો ઉપયોગ કરવામાં આવી રહ્યો છે. ઘણી સ્કેમ જોબ ઓફર્સમાં લોકોને ઓનલાઈન કામ કરવાની લાલચ પણ આપવામાં આવે છે.
ઘણા લોકો ભારતમાં નોકરી શોધી રહ્યા છે. હવે કૌભાંડીઓ પણ આનો ફાયદો ઉઠાવી રહ્યા છે. આ અંગે લોકોને એસએમએસ (SMS) અને વોટ્સએપ મેસેજ મોકલવામાં આવી રહ્યા છે. જેમાં તેમને નોકરીની લાલચ આપીને ફસાવવાનો પ્રયાસ કરવામાં આવે છે.
ચેટ આધારિત ડાયરેક્ટ હાયરિંગ પ્લેટફોર્મ હાયરેક્ટે આ અંગે જાણ કરી છે. રિપોર્ટમાં કહેવામાં આવ્યું છે કે ભારતમાં નોકરી શોધનારાઓમાંથી 56% લોકો તેની શોધ કરતી વખતે કૌભાંડોથી પ્રભાવિત થયા હતા. રિપોર્ટમાં જણાવવામાં આવ્યું છે કે 20થી 29 વર્ષની વયજૂથના લોકો સ્કેમર્સનું નિશાન છે.
આ કૌભાંડ વિશે એક રિપોર્ટમાં કહેવામાં આવ્યું છે કે લોકોને ખૂબ જ સરળ રીતે કૌભાંડનો શિકાર બનાવવામાં આવે છે. જેમાં વધુ પગારની લાલચ આપીને પૈસાની માંગણી કરવામાં આવે છે. નોકરી અપાવવાના નામે આ પૈસાની માંગણી કરવામાં આવે છે.
કેટલીક જોબ ઑફર્સમાં લોકોને ઓનલાઈન કામ કરવાની લાલચ આપવામાં આવે છે. જ્યારે કેટલીક કહેવાતી જોબ એજન્સીઓ નકલી રેફરન્સ અને હેન્ડ ઓન ટ્રેનિંગના નામે પૈસાની માંગણી કરે છે. છેલ્લા કેટલાક સમયથી આ પ્રકારનું ચલણ વધ્યું છે.
દરરોજ 8,000 રૂપિયા ચૂકવવાનો દાવો
ઉપર જણાવ્યા મુજબ, લોકોને ટેક્સ્ટ મેસેજીસ અથવા WhatsApp દ્વારા નિશાન બનાવવામાં આવે છે. આમાં યુઝર્સને કહેવામાં આવે છે કે તેમને જોબ માટે પસંદ કરવામાં આવ્યા છે. તેમને દરરોજ 8,000 રૂપિયા આપવામાં આવશે. આ અંગે વધુ ચર્ચા માટે સંપર્ક કરો. આમાં વોટ્સએપ ચેટની લિંક આપવામાં આવી છે.
મોટાભાગની લિંક્સ જે wa.meથી શરૂ થાય છે તેનો સીધો અર્થ એવો થાય છે કે તે WhatsApp નંબરની છે. જેના પર ક્લિક કરવાથી તે વ્યક્તિની વોટ્સએપ ચેટ તમારા મોબાઈલમાં ખુલે છે. આની મદદથી તમે નંબર એડ કર્યા વગર વોટ્સએપ પર ચેટ કરી શકો છો.
જ્યારે ઘણી વખત તમને નકલી લિંક પર ક્લિક કરવાનું કહેવામાં આવે છે. જેના પર ક્લિક કરવાથી તમને ફિશિંગ વેબસાઇટ પર રીડાયરેક્ટ કરવામાં આવશે. આ વેબસાઇટ્સ મૂળ વેબસાઇટ જેવી દેખાય છે. જેના કારણે મોટાભાગના યુઝર્સ છેતરાઈ જાય છે.
તમારે અહીં ધ્યાનમાં રાખવું પડશે કે યોગ્ય કંપનીમાં નોકરી માટે કોઈ પણ પ્રકારના પૈસા ચૂકવવાની જરૂર નથી. પરંતુ, સ્કેમર્સ તમારી પાસેથી રજીસ્ટ્રેશન ચાર્જ, એજન્સી ફી, અરજી ફી, તાલીમ ફી, ઓફર લેટર ફીના નામે પૈસા લેતા રહે છે.
આમાં સ્કેમર્સ પહેલા તમને વિશ્વાસ કરાવશે કે તમને નોકરી મળી ગઈ છે. આ પછી, તેઓ ઓફર લેટર આપવાના નામે UPI અથવા કોઈપણ નેટ બેંકિંગ દ્વારા પૈસાની માંગ કરશે. તમારે આવા કૌભાંડોથી સાવચેત રહેવાની જરૂર છે.
